مرض ‏البول ‏السكري ‏او ‏مرض ‏السكر

..مرض البول السكري او السكري بس او خلينا نقول مرض السكر .

قبل م نبدأ لازم نعرف ان عندنا هرمون الانسولين (بيطلع من خلايا إسمها بيتا في البنكرياس) ده المسئول انه ياخد سكر الجلوكوز من الدم يوديه لكل انسجه الجسم عشان يتحول هناك لطاقة تستخدمها الانسجه في عمليات مختلفه.. 

وزي م بنقول الاعداد مبتكدبش.. 

٤٤٠ مليون شخص جالهم مرض السكر في عام ٢٠١٧ وبيقولوا انه بحلول عام ٢٠٣٠ هيكون عدد المرضي بالسكر ٥٥٢ مليون شخص.. 

مصر من العشرة الأوائل في عدد اللي عندهم مرض السكر وكان عدد اللي عندهم سكر في ٢٠١٥.. ٨.١ مليون 

مرض السكر بيبقي عندنا مشكلة في هرمون الانسولين $/ وعندنا ٤ انواع من المرض ده :

١) النوع الاول (IDDM) ده بيمثل ٥% ل ١٠%.. والسبب ف النوع ده هو ان الجسم بيهاجم خلايا بيتا اللي في البنكرياس وبالتالي الانسولين مش هيطلع 😭😭 ولا هيقوم بدوره اللي فوق هناك ده 👆 والنوع ده بيبقي في الاطفال اكتر..

٢) النوع التاني ده بقي المشهور بيمثل حوالي ٩٠% ل ٩٥% وده شائع ف الكبار، ف النوع ده الانسولين موجود عادي وبيطلع من البنكرياس لكن خلايا الجسم بيكون عندها مقاومة للانسولين.. يعني الانسولين موجود بس مش بيقوم بوظيفته..

٣) النوع التالت ممكن يحصل مرض السكر بسبب مشكلة في الجينات او مع كبر السن، او بسبب مرض او عدوي معينه في خلايا البنكرياس، ومين عالم مهو ممكن يكون بسبب دواء معين او مادة كيميائية..

٤) النوع الرابع وهو ارتفاع نسبه سكر الجلوكوز في الدم اثناء فتره الحمل🤰..

$/عوامل بتساعد في حدوث مرض السكر:

١) كالعادة دايما زيادة الوزن وعدم ممارسة الرياضه او بذل مجهود بدني، برضه اكل السكريات كتير دي مشكلة...

٢) التدخين، مينفعش نكتب بوست طبي من غير نذكر التدخين، لان الاشخاص اللي بيدخنوا فرصة ان يجيلهم مرض السكر تذداد بنسبه ٤٥% عن الاشخاص اللي مش بيدخنوا.. 

٣) الضغط النفسي الكتير زي الاكتئاب وزيادة ضغط الحياة والمفرمه اللي احنا عايشين فيها ليها دور كبير ف الموضوع ده..

$/مشاكل خطيرة ممكن يسببها مرض السكر:-

١) ضعف الرؤية وممكن العمي ممكن يحصل بعد ١٥ سنة من المعاناة مع مرض السكر

٢) نسبه ٥٠% من المرضي بيحصلهم تلف في الاعصاب

٣) وفيه ٥٠% تاني بيبقو معرضين جدا انهم يتصابوا بامراض القلب والسكته الدماغية.

٤) حوالي ١٠ ل ٢٠% بيموتوا بسبب الفشل الكلوي الناتج عن مرض السكر..

$/ اخر نقطة عشان عارفكوا تعبتوا وانا برضه تعبت... ازاي نقلل فرصة اصابتنا بالسكر..

١) نشر الوعي بين الناس عن مرض السكر ونعمل توعيه حلوة كده زي البوست ده مثلا..

٢) نظبط يومنا واسلوب حياتنا، يعني نحاول نعمل مجهود بدني او رياضي بانتظام.. ولو فيه زيادة وزن او سمنه نعالجهم.

٣) نقلل التدخين علي قد م نقدر، ونعالج ضغط الدم ونتخلص من الضغط النفسي.

٤) لو حد اتصاب نعمل الفحوص اللازمة ومنكبرش دماغنا..